كيس فول ورغيفين
كيس فول ورغيفين عيش …
عنوان يصلح لفيلم لكن للأسف دي واقعة بالفعل حصلت وتناولتها الصحافة ونفاها الشخص الي عمل الواقعة …
نحكي الواقعة الأول التي تناولتها المواقع وبعض الصفحات عن زيارة وكيل وزارة التربية والتعليم ببني سويف محمود زكريا الفولي لمدرسة نزلة المشارقة بمركز إهناسيا وذلك أثناء جولات المتابعة ، ودخوله أحد الفصول وملاحظته لوجود كيس فول ورغيفين عيش جابتهم طالبة بالصف الأول الثانوي تتقوت بيهم طوال يوم دراسي شاق بيبدأ من السابعة صباحاً مروراً بالدروس والمجموعات …
وعلى حسب الأخبار المتداولة أن وكيل الوزارة قعد يسأل الطالبة هتاكليهم ازاي طبعاً هتقعدي في الفسحة وتغمسي وأمر بتحريز المضبوطات !!!! والبنت جت لها حالة نفسية وروحت بيتها منهارة بتبكي ورفضت تروح المدرسة …
وعندما تواصلت بعض الصفحات مع والد الطالبة أفاد إنه موظف في التربية والتعليم وإنه خايف يتم التنكيل به وفوض أمره لله في حق بنته .
ملقيتش غير موقع واحد ناشر رد وكيل الوزارة عن الواقعة الي نفاها تماماً وقعد يحلف ويقول والله ما حصل ده انا كنت بتكلم في إطار التوعية الصحية عن مأكولات الشارع وحد من الزملاء ربنا يجازيه خير خد الكلام وصاغه بشكل مختلف ، طب هو فيييين الحرز ده ، وقال كلام من نوعية أنا بخاطب بناتي الطالبات … ايش حال ما كان اسمك الفولي ولا سيادتك افتكرت إن البنت بتتنمر على اسمك وقررت تسفلت كرامتها أمام زميلاتها
كلام وكيل الوزارة لم ينفي الواقعة لكنه صاغها بشكل مختلف عن الروايات المتداولة ، ولم ينكر وجود كيس الفول والرغيفين لكن تساءل هو فين الحرز ده !!!! حاضر يا فندم هنطلع لك الحرز من جيوبنا 🫤🫤🫤
ازاي تكونوا تربويين ومش عارفين تخاطبوا الطلبة بشكل يليق بالتوعية ؟؟؟؟ ازاي تكون مسؤول وتتنمر على لقمة لبنت بسيطة دي مقدرتها المادية الي تقدر تتقوت بيها وده الي ينفع تجيبه يومياً ب 15 جنيه وتصرف زيهم في المواصلات … تلاتين جنيه بيدفعها يومياً أب موظف بسيط لبنت واحدة فقط ما بين المواصلات واللقمة وعنده غيرها عيال تانية ده غير فلوس الدروس وباقي مصاريف اليوم من غداء وكهرباء ومياه وعلاج وبلاوي بيعيشها كل أب وأم حالياً .
أقسم بالله الكثير من المسؤولين محتاجين دورات للتأهيل النفسي قبل ما يتعامل مع طلبة أو مواطنين .
البنت دي لازم يتجبر خاطرها يا سيادة وكيل الوزارة عيب عليك ومش دورك التوعية دي طالما مش مستوعب إمكانيات الأهالي في المكان الي انت مسؤول عنه ولا تجرؤ تطالب الوزارة بالوجبات الساخنة الي سمعنا عنها ، هات متخصصين يخاطبوا الطلبة ويعلموهم بما يتناسب مع إمكانياتهم المادية مش يتنمروا على اللقمة الي أهاليهم قادرين يوفروها لهم بشق الأنفس وبطفح الد*م وشقاء يوم كامل يتحصلوا فيه على جنيهات قليلة تستر عورات بيوتهم وتقيم أود عيالهم .
أجمل حاجة حصلت في الموضوع اني شفت تعليق لصاحب مطعم بيقول الوجبة دي أكيد من عندنا ، والرجل بارك الله فيه قرر تقديم وجبة إفطار يومية للطالبة طوال سنوات الدراسة ومش ليها هي بس الوجبة لعدد 3 أفراد .
وعن نفسي بقدم الدعوة للطالبة الجميلة دي تيجي القاهرة على حسابي وعزة جلال الله وأقضي معاها يوم جميل نتفسح فيه أنا وهي وتكون سبب في سعادتي وإني أخرج من هموم وضغط الشغل والحياة … يا رب يا حبيبتي تقبلي دعوتي ليكي وتجبري بخاطري
الراحمون يرحمهم الله ، وجابرو الخواطر يجبرهم الله ، وربنا ينتقم من أي حد يكسر خاطر الناس ويتعالى على ظروفهم. .
منقوووول
