نصيحة ست كبيرة

بصي حبيبتي، مش عايزة الكفتة تفك منك لما تدخلها الفرن؟ اعصري البصلة كويس وحطيها، وحطي ربع معلقة بيكنج بودر على النصف كيلو لحمة، هيديها طراوة جميلة.

– الفانيليا:
يا سلام عليها لو ضيفناها على أي حاجة بتخليها خيال، على العصاير خصوصًا لو أي حاجة فيها لبن، زي البلح والجوافة والموز. أي عصير هتحسي طعمه زي اللي بتشربيه في أحلى الكافيهات.

وممكن نضيفها على الفشار كمان.
مش بقولكوا الفانيليا دي حاجة تحفة.

– تالت تكة:
أما بسيح السمن بضيف له ورق لورا وحبهان، بيديله ريحة حلوة أوي وبيتخزن لمدة سنة بنفس الريحة.

– رابع تكة:
صلصة الكشري أما بعملها وتخلص بعمل لها طشة ثوم بكزبرة كتير، بتفرق في طعم الكشري، وده سر من أسرار كشري أبو طارق.

– خامس تكة:
البشاميل ضيفي له معلقة نشا، وحطي على وشه لبن بودرة، يا سلام خرافة.

– سادس تكة:
حفظ الخضروات الورقية زي الشبت والبقدونس والجرجير، أنا بغسلهم وأنشفهم في فوطة نظيفة، بس ما يكونش فيه نقطة مية واحدة، وألفهم في ورق أبيض نظيف مش كيس، علشان الكيس بيعمل بخار مية وينزل على الخضار يسوده ويبوظه.

– سابع تكة (بواقي الكيك):
لو عندي بواقي كيك بفتته وأعمله تورتة جيلي. بعمل جيلي في قالب، ولما يجمد بفتت عليه نص الكيك، وبعدها طبقة كريم شانتي، وبعد كده باقي فتافيت الكيك، وأصب باقي الجيلي وأسيبه يبرد في التلاجة تاني.

– ثامن تكة:
الملوخية متحاوليش تقطفي العنق معها، هيسهل عليك خرطها.

– تاسع تكة:
أما تخزني خضار أو فاكهة في الفريزر، ما تنسيش تخرجي الهوا اللي في الكيس علشان الحاجة اللي جواه ما تسودش وتفضل محتفظة بلونها.

– تكة رقم 10:
لو عاوزة تعملي أكلة شكلها شيك وموفرة في نفس الوقت، ممكن تعملي الشيش طاووق بس بدل الفراخ تحطي بطاطس مكعبات، وطعمها يجنن وشكلها جميل.

– تكة 11:
لو عندك بواقي رز، ممكن تضيفي عليه بيضة وبهارات وتعمليه في الكبة، تكوريه زي الكبيبة وتفتحيه من النص وتحشيه جبنة بزيتون وفلفل وتقليه في زيت.

– تكة 12:
لو السويسرول اتكسر أو اتفتت منك وإنتِ بتلفيه، اعمليه تورتة مستطيلة. اقسميه اتنين بالطول واعمليه زي ما بتعملي التورتة عادي، احشيه كريم شانتي من النص، وضيفي النص التاني وزوقيه على ذوقك. أنا عملت معايا كده وقلبته تورتة.

– تكة 13:
لو هتعملي رز بالخلطة ومكسلة تعملي الكراميل، أنا بضيف له معلقتين عسل أسود، طعمه بيكون حلو أوي بجد.

– آخر تكة:
أما بعمل شوربة لسان عصفور بحمرها وأسيبها شوية، علشان لو ضيفت عليها الشوربة على طول لسان العصفور بيتشقق كأنه مكسر.

التفاعل بطيء أوي، تفاعلوا علشان تشجعوني.
رايحة فين؟ هفكرك تاني، تابعي وعلقي بسرعة.
وصل على الحبيب علشان قلبك يطيب.